عوزه جوزك يعشقك . ازاى جوزك يحبك

Admin المساهمات : 227 تاريخ التسجيل : 15/09/2013

السلام عليكم ورحمة الله

اللهم صل وسلم وبارك على سيدنا محمد اشرف المرسلين

يابنات والله ما كتبت الموضوع دا الا لوجه الله وسامحونى لو اتكلمت فيه بحريه شويه

*********
كل هدفى أعمار بيت مسلم وحل لمشكله ممكن تقابلنا فى يوم من ان جوزك عاوز يتجوز عليكى

ولا غيره من المشاكل

***********

هدخل فى الموضوع على طول

اولا عشان جوزك يحبك ويشيلك فوق راسه ويبقى زى الخاتم فى صوباعك لازم تعملى المستحيل

بس معانا مش هيبقى مستحيل ان شاء الله هنقول اننا هنحاول نتأقلم عليه واحده واحده لان كل شئ هقوله

فيه شئ من الصعوبه بس فيه شئ من المتعه والراحه فى باقى شئون حياتك

**************

أولا لازم تعرفى ان الراجل ليه مزاجيه خاصه بيه وفى أوقات بيبئا نفسه فى حاجات واوقات لاء اى حاجه حتى الاكل والشرب

وكمان فى اوقات بيبئا عاوز يتخانق وخلاص من غير سبب

لازم تفهمى عشان تخلى جوزك زى الخاتم فى صوباعك لازم تمشى على خطوات فى كل شئون حياتك

مش فى شأن واحد لان كلها بتكمل بعضها والهدف منها انك تحسسيه بكامل رجولته

*************

اول حاجه يافتوكات هنتكلم فى الحاجات الى بتحصل برا البيت وبعدين الى جوه البيت

وزى ما اتفقنا كلها بتكمل بعضها

أولا بالنسبه لبرا البيت طبعا كل راجل بيختلف عن التانى فى طبعه وتربيته الى اتربى بيها

وكمية العقد الى اتعقدها فى حياته

لكن المتفق عليه انه راجل فى الاول والاخر

-----------------------

وأنتى برا البيت لازم تعرفى ان جوزك بيبئا عاوز يبين كامل رجولته اكتر من جوه البيت

ولو نجحتى فى المأموريه دى ودوستى على نفسك صدقينى هتستهل عليكى جوا البيت كتير

بمعنى أولا لو رحتو عند أهلك او اهل جوزك وخصوصا اهل جوزك حاولى متقوليش لاء

لجوزك على قد ما تقدرى وياريت تنسيها خالص وانتى برا البيت حتى لو كنتو لوحديكو فى العربيه رايحين لحد

عارفه يابت يافتوكه كل راجل فى الدنيا بيتكبت فى بيت اهله ودا السبب الرئيسى للراجل الى بيتجوز

يعنى فى شباب كتير مش متجوزين ولا فى فدماغهم الجواز اصلا ولما تسأليه هيقولك انا مش ناقصنى حاجه

اتجوز واحده تتحكم فيا وتنكد عليا

لكن اكتر الرجاله الى بيلجئو للجواز او الشباب هما الى كانوا مش حسين برجولتهم فى بيت اهلهم

بمعنى انه لو ليه اخت بنت بيبئا نفسه يتحكم فيها وطبعا لو ابوها عايش كتير بيرفض والكلمه

الشائعه للابهات لما تبقى فى بيتك وبتصرف على نفسك وعلى مراتك ابقى اتحكم فيها زى ما انت عاوز

وكل خناقه بنفس الكلام بسبب طلب طلبه اكله امه عملتها ومبيحبهاش نفس الكلمه بتتقال

ويفضل الاستاذ حاطط فى راسه الفكره دى وبتكبر يوم بعد يوم لحد ما يقابل المسكينه الى يحس فيها

بالانكسار الى حد ما الى يقدر يطلعه عليها وساعات العكس لو حس فيها بالقوه يعجب بيها اكتر ويبئا نفسه

يحقق زاته بكسر القوه دى

حل الحوارات دى كلها أنك تضحكى عليه عارفه ازاى تعملى الى انتى عاوزاه وانتى بتفهميه طول الوقت انك بتعملى الى هوا عوزه

طب دى كبيره علينا يا مرمر هفهمك ياستى

الراجل طول الوقت ليه طلبات جوه البيت او برا البيت

وبرا البيت اكتر زى ما اتفقنا اول خطوه لازم تقولى حاضر على كل حاجه

وكمان ممكن تبقوا متفقين على حاجه ويتعمد يغيرها لما تخرجوا عشان يشوف رد فعلك

او يشوف مدى عقلك اعتبريه طفل صوغير وخديه على قد عقله

واهم شئ قدام اهله متكسريلوش كلمه وتحاولى على قد ما تقدرى متشتكيش من حاجه

لو اشتكيتى تبقى عبيطه لان فى من اهله الى بيحبك وفى الى لاء وكل واحد هيستغل الحكاوى دى

ويعرف نقطة ضعفك وضعفه ايه وياخدها لصالحه لو هما من الناس الى ربنا يهديهم

اما لو هما ناس طيبين ومحترمين برضو حكاويكى وشكاويكى هتعملك مشاكل

لانه لو راح مره لوحده هيعرفوه انك بتشتكى منه وهيعود عليكى بالسلب

لازم تفتحى عيونك كويس ومتسيبيش حاجه للظروف

لو عوزه تكسبى جوزك وتلمى بيتك

حاولى تنفخيه اوى قدام الناس سواء اهله او اصحابه او الجيران او فى الشارع فى المواصلات

البدايه انك تقولى حاضر قدام اهله لما يطلب منك طلب تقولى حاضر انت تأمر يا حبيبى

حتى هوا هيستغرب لانه مش متعود لازم يتعود على كدا لو انتى عوزه تعوديه على عدم الاستغناء عنك

****************

حاولى متحرجهوش برا البيت لاى سبب مادى او معنوى وحاولى لو حصل منه اى حاجه ومعجبتكيش

متشغليش الاسطوانه وتنكدى عليه وعلى عيشته وانتو برا ولا وانتو جوه دى ليها وقت هتعاتبيه فيه

مهما ان كنتى عصبيه أملكى نفسك ومهما ان كان جوزك مستفز غيريه مش تسيبيه وتخربى بيتك

عوزه اقولك على حاجه لو حسه انك عاوزه تطلقى وخدتى القرار خلاص وهتبدئى فى التنفيذ

ابعدى عنه شويه وفكرى مع نفسك تفتكرى لو اطلقتى واتجوزتى واحد تانى مش هيبئا فيه عيوب ومشاكل

استحاله يبئا الاحسن انى احاول اتعايش مع الى معايا واحل العيوب والمشاكل بالذكاء

على الاقل عرفت معظم طبعه احسن ماتبدئى من اول وجديد مع واحد تاخديلك يومين حلوين

وترجعى تلفى حوالين نفسك تانى لانك مش عارفه تحلى المشاكل الى فيه او الى بتحصل بينكم

يبئا المفتاح بسيط قررى تتذاكى عليه وتخلى راسك وتفكيرك اكبر منه

عرفتى برا البيت هتعملى ايه السمع والطاعه والنفخه الكدابه افتكريهم كويس اوى

حسسي كل الى حواليه انك اسعد انسانه فى الدنيا انك اتجوزتيه

حتى لو انتى مش كدا

حتى لو زعقلك او اهانك مترديش ولو حد ادخل تقوليله جوزى وهوا حر فيا

حتقدرى تعملى كدا اه اكيد ان شاء الله عشان احنا مننهزمش بسهوله ومش بعد ما

اخدناهم وبنيناهم وعملنا منهم حاجه نسيبهم لواحده تانيه على الجاهز تيجى تاخده منك

ولا هيا ازود منك ولا انتى انقص منها ولا هيا عندها عقل وتفكير وبتخطط وانتى مش نازلك الاوبشن دا

**************

ندخل بئا فى المهم جوه البيت يا أموره

جوزك ليه طلبات ولو عندك كمان اولاد ليهم طلبات

وانتى ليكى طلبات

لازم تعرفى حاجه وتحطيها حلقه فى ودنك

على قد ما تهتمى بنفسك على قد ما الى حواليكى يهتمو بيكى

يعنى مثلا البرنامج كل يوم كدا كدا بيتنفذ

البيت والطبيخ والاولاد و............ الخ

اعملى كل دا وانتى على سنجة عشره

مش هتاخدى وقت على فكرا

أنتى مش كدا كدا بتدخلى الحمام اه طبعا

اول ماتصحى بالمره اغسلى سنونك بالمعجون

بلى قصتك وابرميها واشبكيها ببنسه عشان تتفرد

عبال ما تعملى حاجه فى الشقه

البسى حاجه عليها الايمه مش عشان انتى فى البيت

تبقى ام سحلول رابطه راسك بمنديل

ولابسه جلابيه روايح الطبيخ منها مفحفحه

يافتوكه فى الاكل والشرب بيقولو العين بتاكل قبل

الفم مابالك الراجل ومراته

************

عينه هتشتهيكى وتشتهى شكلك قبل عقله

وكله ليه تأثير كبير

والموضوع بسيط

ولازم تحافظى على واجبات ربك خلى بالك من الموضوع دا

لان القران الى بتقريه فى الصلاه بيطرد الشياطين من بيتك

الى بيستنهزوا اى فرصه عشان يولعوا الدنيا ويفرقون بين المرء وزوجه

ومية الوضوء بتطفى الانفعال

وتغير من مودك وتخليكى نضيفه فى كل وقت

وانتى بتتوضى كل مره اغسلى تحت أبطك

وحطى مزيل عرق

ولو اى مكان تانى عرقان بالمره

متستخسريش فى نضافتك الشخصيه

دا عامل مهم وهيكملك ويساعدك فى حاجات كتير

أنتى مش هتخسرى حاجه كدا كدا بتتسرحى

حطى توكه شكلها حلو فى شعرك بطريقه حلوه

وجرى قلم كحل فى عينك مع فرشتين روجاجو

دا ابسط شئ مش هياخد دقيقه خليهم حتى فى مراية

الحمام عشان يبقو قريبين من ايدك

هتلاقى وشك أختلف فى عيون جوزك

ووانتى بتعملى الواجبات اياها المنزليه

هتبقى حالتك النفسيه احسن كتيييييييييييييير

***********

لما يحصل مشكله بينكم او اختلاف

متتعصبيش وتضربى البوز اياه وتمسكى العيال

تضربيهم وتعدى تجعرى لما تفرجى الناس عليكى

لانه هيلجأ لحاجه من الاتنين

يا أما هيسيبلك البيت وينزل يفرفش برا

مع صاحبه ولا اى حد وشوفى بئا ممكن مين تانى يقع فى سكته

او هيسيبك ويدخل ينام ودا اخطر واخطر

لان دكاترة التنميه البشريه بيقولو ان

تلت اربع الحاله النفسيه والمعنويه بتاعت الانسان

وسلوكه ونجاحه وفشله وعلاقاته بتتشكل بشكل كبير

قبل النوم

يعنى والواحد حاطط راسه على المخده وعمال يفكر التفكير

الى بيسرح فيه لحد ما ينام

حتى بيقولك جربى لو بكرا عندك يوم مضغوط

او مزحوم ومش عارفه تتصرفى فيه

قبل ما تنامى النهارده اعدى رتبى فى عقلك

يومك بكرا وقولى هعمل كدا وبعدين كدا ان شاء الله

هتلاقى العبء النفسى خف كتيييييييير

تانى يوم وبتتصرفى بمرونه وسرعه غير لما تنامى

وانتى حاتله الهم

يعنى جوزك لو دخل ينام بعد خناقه مبينكم اعرفى ان بكرا اسوء

لانك متعرفيش هوا كان بيفكر فى ايه

قبل النوم بيضرب نفسه بالجزمه انه اتجوز

ولا بيفتكر زكرياته القديمه الى كانت كلها دلع وحب

ولا بيتحسر على عمره الى هيروح مع واحده نكديه

والله بئى لو معاه زميله عزيز لذيذه حبوبه فى الشغل

بتضحك على طول وواخده الحياه بييييييييس

وفريش طول الوقت شوفى بئا تبقى عملتى فى نفسك

كارثه انتى الى هتندمى عليا

فى الغالب الراجل مبيشيلش نفسه اى زنب ولا اى جانب من المشكله

بالعكس وكمان مش هيفكر ان الى بتضحك

وبتفرفش فى وشه دى فى البيت مع جوزها

شبهك بظبط او لو كانت مش متجوزه

لانه ببساطه مش شايف غير الجانب الحلو

للاسف وانتى مش مورياه غير الجانب الوحش

رغم انك ممكن تكونى ست عظيمه

صابره على ظروفه ومستحملاه هوا وقرف عياله

وبتيجى على نفسك وكتيييييييييييييير

من الى احنا شاربينه

طيب ينفع تضيعى صبرك واستحمالك

دا كله على الفاضى مش الى بيعمل

صينية بسبوسه بيرش عليها عسل

ولا رمل

متضيعيش كل دا

لما تحصل خناقه ولقيتى جوزك بيزعق

تعملى حاجه من الاتنين

يأما تسكتى خالص وتقوليله بص يا حبيبى

لما تهدى نتكلم ونحل الموضوع وانا هعملك الى انت عاوزه

وانتى مش هتعملى الى هوا عوزه ولا حاجه

انتى بتمتصى غضبه زى الطفل بتسايسه عشان تنسيه

ولو لقيتى نفسك مش قادره تعصرى على نفسك لمونه

وتقولى الكلمتين دول مع ان ليهم تأثير كبير

فى عز زعله عليكى واهانته ليكى

ابعدى خالص وروحى اتشطفى او خدى دش

واخرجى البسى حاجه عليها القيمه

واعمليلك حاجه تشربيها وانتى احطه كام لون فى وشك

واعدى جمبه عادى لحد ما يبدأ يفتح الكلام

وتبدأى بعتاب مش تقفلى الباب فى وشه

مهو هتيجى الى تفتحه يا ذكيه

انتى خلاص كدا هتبقى عديتى نص المرحله

واصعب حاجه

اولا تجاوزتى الشيطان الى واقفلك وضحكتى عليه

ثانيا قدرتى تملكى نفسك ومتقوليش كلمه تزعله

عشان مياخدش الموقف لصالحه وتبقى مضطره انتى

الى تصالحيه

لاء بالعكس انتى انسحبتى بمنتهى الرقه والانوثه

ولما تيجى تعاتبيه كذلك بمنتهى الرقه الانوثه

هتلاقيه قرب يبوس رجلك

وبينه وبين نفسه زعل انه زعلك لكن مش هيقولك

هيحاول يعبر عن دا بالطريقه الى على قد تفكيره

لازم تعرفى ان الراجل تفكيره محدود

مش ذيك وذكاءه مش ذى ذكاءك وكل الدراسات العلميه بتقول كدا

طيب نجى لموضوع مهم وندخل فى تفاصيل اكتر

وكلام حر شويتين

فى المشاركه الجايه ان شاء الله